#57

 Descargar PDF

¿Sabes de algún acto en la Comarca y quieres que lo publiquemos?

¿Tienes alguna queja, inquietud o sugerencia?

Si quieres verlo reflejado en EL FARO contacta con nosotros en elfaro@elfaro.as

El club llogra subir a Primera Rexonal en namás dos años y prepara la creación d’un equipu B

A. BERNARDO (Lluanco)

El Gozón Club de Fútbol ta de fiesta. En sólo dos temporaes —l’equipu nació’l 17 de xunetu de 2005, cuasi al empar qu’EL FARO— la so direutiva y los sos xugadores llograron colocase en Primera Rexonal, una trayeutoria de la que nun puen presumir tolos equipos.

El so secretu ye’l deporte n’estáu puru. El presidente del Gozón, Ramón Artime «El Chato», entá s’alcuerda de que tuvieron qu’entamar «de cero», non sólo dende la categoría mas baxa, sinón qu’amás na so cuenta corriente nun había «ni un céntimo».
Tres una temporada espectacular, los gozoniegos proclamáronse campeones, con dos puntos de ventaxa sobre los segundos.

El proyeutu nació pa dar una oportunidá a los mozos del conceyu que queríen xugar al fútbol ensin tener que colar fuera. El primer equipu del pueblu y segundu de toda Asturies, el Marino, nun tenía cabida pa esta xente, asina qu’l Gozón surdió pa cubrir esti furacu. Los xugadores son xente mozo que trabaya y que fai un gran esfuerzu pa caltener la so afición. «Hay chavales que trabajan en la empresa familiar, autónomos y empleados», esplica Artime, al tiempu que recalca la dedicación de los futbolistes, que tienen unes edaes ente 19 y 33 años.

Por mor de les sos obligaciones, los mozos tienen qu’entrenar casi de nueche, a les 20 hores, al salir del trabayu. La esperiencia de la direutiva tamién ye d’aplausu, yá que n’estos dos años xuntáronse cuasi toles tardes «para planificar el futuro del equipo». Nun son profesionales, pero deprendieron rápido. Hasta la muyer d’El Chato collabora, ye la secretaria.

Ramón Artime diz que tamién tuvo la suerte de facer un «fichaxe estrella» nos comienzos: el tesoreru de la entidá, tamién nomáu Ramón Artime, que ye’l presidente del Muséu Marítimu de Lluanco y tien esperiencia nel sector de la banca.

Gracies al so llabor y al sofitu de munches empreses del conceyu, esti añu tuvieron 30.000 euros de presupuestu. Agora toca «meter más caña» pa la próxima temporada, yá que xugar en Primera Rexonal supón más dineru. Eso tamién s’aplica a los socios. Nesta campaña tuvieron 194 pero paez qu’a partir de setiembre serán munchos más. «Hay mucha gente que me está preguntando para apuntarse», conseña’l presidente.

Subir a Primera trai munchos cambios. Por exemplu, el Gozón va tener que contratar un entrenador tituláu, y los del conceyu tán yá trabayando, polo que toca buscalu fuera.

Pero’l conxuntu nun escaez a los de casa y, por eso, va montar un equipu B, que xugará en Segunda Rexonal. «Hay 30 o 40 chavales queriendo entrar y ni puedo ni quiero dejar a la gente tirada, así que vamos a poner en marcha un equipo B», recalca Artime.

Al Gozón va-y too bien y merezlo. Atrás queda la primer temporada, cuando quedó enmarcáu nel grupu de los equipos del Occidente, colos viaxes y el gastu que conllevaba. Nesi tiempu nin siquiera teníen campu y debieron entrenar n’Alcoa. Agora’l so terrenu son les instalaciones de Llagarcivil, en Balbín, onde tolos domingos reciben les visites de un buen númberu de aficionaos.

Ye un triunfu del trabayu duru y humilde nun deporte, el fútbol, que ta «muy movido por el dinero», según reconoz el propiu Ramón Artime.

Volver a la portada